En Paradores sabemos que viaxar é moito mellor cando ninguén queda atrás. E si, iso inclúe a ese compañeiro fiel que te mira como dicindo: «eu tamén vou, verdade?». En Paradores témolo claro: si, vés. Por iso, cada vez son máis os hoteis que abren as súas portas ás mascotas, para que poidades compartir escapadas inesquecibles en contornas únicas, xa sexa en plena natureza, xunto ao mar ou no corazón de cidades cheas de historia.
E non, non é só que poidan vir, é que aquí recibirémolos como merecen. Desde o primeiro momento, o teu compañeiro peludo terá o seu propio kit de benvida con camiña e comedeiro. Porque si, pode que a viaxe a organices ti… pero quen realmente a vai desfrutar ao máximo é el.
Iso si, antes de facer a maleta, como en toda boa escapada, hai algunhas normas básicas para que todo funcione á perfección. É importante consultar sempre previamente co Parador elixido as condicións específicas (peso, raza, etc.) no momento da reserva. Durante a estancia, a túa mascota deberá ir atada, en brazos ou en transportador nas zonas comúns, e non poderá quedarse soa no cuarto. Se queres coñecer todos os detalles, podes consultalos aquí.
Con isto claro… empeza o divertido: elixir destino.
Un mapa de plans para todos os olfactos
Se o teu compañeiro é dos que non entende a palabra «cansazo», os destinos de montaña serán o voso terreo de xogo ideal. Bielsa, Cangas de Onís, Cazorla, Fuente Dé ou Gredos invítanvos a perdervos entre bosques, rutas e paisaxes onde correr, explorar e parar só para respirar fondo.
Se, en cambio, sodes máis de brisa mariña, area baixo as patas e paseos infinitos xunto á auga, podedes poñer rumbo a lugares como El Saler, Ribadeo, Málaga Golf ou as illas, onde o ritmo o marcan as ondas.
E para quen prefire escapadas urbanas con historia, cultura e paseos tranquilos, cidades como Albacete, Tordesillas, Tui, Ceuta ou Benavente son o escenario perfecto para descubrir xuntos novos recunchos.
Pero se hai algo que realmente marca a diferenza en Paradores, como ben saberedes, é durmir en lugares con historia. E si, tamén hai Paradores históricos onde as mascotas poderán desfrutar «olfacteando séculos» de historia. Para elas (e para ti), destinos como Ciudad Rodrigo, Guadalupe, Jarandilla, Verín ou Zafra e mesmo, Casa da Ínsua, en Portugal, son pura experiencia.
Plans xuntos, tamén no Parador
Nalgúns Paradores, ademais, a túa mascota poderá acompañarte en espazos de cafetería ou terrazas onde desfrutar dun aperitivo ou unha copa con vistas. Momentos sinxelos que, compartidos, saben moito mellor.
O único problema é elixir só un. Con tantos destinos e plans, neste caso, o difícil non é viaxar coa túa mascota… é decidir onde ir primeiro. Pero tranquilo, sempre hai tempo para repetir.
Así que xa o sabes: prepara a súa correa, mete o seu xoguete favorito na maleta e elixe o voso próximo destino en Paradores. Porque, se algo está claro, é que as mellores viaxes… son as que se comparten.
E lembra: podes consultar toda a información, condicións e Paradores dispoñibles nesta ligazón.
